Skip to content
![](https://wamadaat.com/wp-content/uploads/2023/01/FB_IMG_1673788114606-1.jpg)
أدبية ثقافية فنية متنوعة
( فص ملح ، و داب )
بقلم : حسام صقر
وعدت ابعد و اغيب عنك
و اعيش للعيله و الأصحاب
لقيت قلبي بيوجعني
و ماتحملش ليله غياب
و لما سألته إيه مالك
بكى قلبي مرار و عذاب
أقول له اهدى و بلاش حرقه
خلاص ، اعتبره جرح و طاب
يرد القلب و ينـهنـه
و يسألني انت ليه كداب
بتوعد و انت مش قادر
و لا عامل لحالي حساب
أنا عشت اللي فات كله
وانا شايف سعادتي سراب
و لما الدنيا تضحكلي
و تديني بدون أسباب
تقوللي أبعد و أغيب وأنسى
تقوللي أعتبره جرح و طاب!!
طب أبعد ليله لو تقدر
و قفّل ألف سكه و باب
خلاص جرب ، هتلقاني
كأني فص ملح و داب
كأني فص ملح……… و داب
حسام_صقر
صباحك_سعادة
عن الكاتب
Post Views: 701