بقلمي/رحاب عصام أبوطالب
بيوتنا بيوت دافية
مليانة حب وحنية
فيها صوت ام كبيرة
ودعاوي قلبها لينا
وخوفها علينا من اي حد يعادينا..
بيوتنا دافية بينا
بصوت اب موجود
في رجولته متحاوطين بسور
وفي بعده الدنيا تيجي علينا..
بيوتنا باولادنا جنة
بلمتهم وضحكهم ولعبهم
بدوشتهم وكركبتهم وعُنفهم ..
بيوتنا دافية بقلوبنا النقية
أما تبقي راضية ع العيشة
وتحمد ربنا نعمه يدومها علينا..
نعمة البيت ستر لحياتنا
وستر لضٓعْفِنا وأوقات ابتلاءنا..
بيوتنا بيوت أمينة
أهالينا هما الونس لينا
وسيرتهم طول العمر جميلة..
بيوتنا ليها ريحة
من بيت لبيت تلاقيها
ريحة الزمن محفورة
في كل ركن بالحيطة
وعلي كل باب اوضة
خربشة ذكريات لينا
وكل تابلوه قديم زينة
ليه حكاية ومعاني غريبة ..
بيوتنا بالبركة مستورة
وبرضا ربنا علينا ..
والصحة تحت سقف بيتنا
بكنوز الدنيا واللي فيها ..
بيوتنا هي الذكريات
فتحت أبواب لكل الناس
ده تعبان وده جعان وده قلقان..
بيوتنا بيوت أصيلة
شبعانه بلقمة حلال تكفينا
وتزيد بحمد ربنا عليها..
بيوتنا بيوت ناس نضيفة
تبعد عن قعدات غيبة ونميمة
بيوتنا عايشة بأهالينا
مفتوحة بعزهم وتربيتهم الاصيلة..
حتي لو الملامح اتغيرت وكبرت بالزمن
بس الاصل بيوتنا حقيقي غالية علينا..