ف الخمسينة
بقلم : نجلاء الجزار
القيم……
القيم كتيييير فى حياتنا بس فقدنا منها كتير إن مكناش فقدنا معظمها……
ليه منحاولش نرجع و لو قيمة واحدة لأطفالنا.
القيمة دي موجودة فى كل المدارس فى طول البلاد و عرضها و بتتكرر كل يوم الصبح بس مع الأسف مفقودة و مهدرة.
طبعاً كلكم بتسألوا نفسكم قيمة إية دي؟؟
قيمة مهمة جداً فحياتنا
وهي قيمة … حب الوطن.
و أزاي مهدورة و مفقودة و أزاي ﻧرجعها؟
تعالوا معايا فمشهد متكرر كل يوم الصبح في طابور المدرسة الصباحي
و هو مشهد تحية العلم اللي بيعدي و بيمر مرور الكرام .
ولاد بتردد و هي مش فاهمة هي بتقول أية…..
و ولاد بترقص علي الأنغام…..
و ولاد بترغي مع بعضها……
و ولاد أصلا مش موجودة غير بجسمها و بس و لسة سارحة في بريك الفطار و حصة الألعاب اللي هتاخدها……
خد الأكتر الكبار نفسهم مش ملتزمين بتحية العلم ولا بيرددوا التحية ولا بيقولوا النشيد الوطني
لا و كمان عادي بيتحركوا فالطابور بشكل عادي.
دى ملحوظة تستحق التوقف عندها
وإن كانت ليست ظاهرة عامة
يا جماعة دة غلط لازم نربي الولاد من صغرهم
علي إن بلدنا غالية ،
و مهم إننا نكون ملتزمين تجاهها و دا بيظهر و احنا بنحيي العلم.
خدوا بالكم اللي احنا بنعملوا بينعكس علي ولادنا.
أولادنا أمانة
والوطنية والانتماء سلوك وقدوة
مهم رجوع القيم لسلوكياتنا وبيوتنا و مدارسنا و شوراعنا.