خبينى ما بين رمشك
ــــــــــــــــــــــــــــــــــ
للشاعرة : يامنة اليمنى
هو…
وانا وياكِ باشوف الكون
فراشة تطير
وشِعر جماله ف التعبير
وبانقش لك على صدرى
حروف أسمِك
دى روحى رواية
من شِعرك
يافرحة حتى فى مشاعرك
بتحيينى
تعالى وفيكى خلينى
وخبينى مابين رمشك
ده لو شفتى ف يوم حالى
أكيد هصعب على قلبك
ومهما قولت انا بحبك
ما بيكفيش
وحق الحضرة والدراويش
انا عاشقك
ومش فارق معايا الكون
ما دام ف القلب أحلى عيون
ياملكانى ووخدانى
بعيد عن كل شيئ فيا
ياجنة قلبى ياحورية
وحق الله انا بعشق
عنيكى السمر
باشوفهم كل ثانية
كأنى بشرب خمر
وشفت الويل ونجم الليل
فى عز الضهر
وآه م العشق ياولداه
وآه من شهد طعم المر
عشان عاشقك ومش طايلك
ولا قادر أعيش حبك
عشان خايف
حقيقى بجد مش عارف
اقولهالك
انا ف الحلم خيَّالك
وراكب فوق حصان ابيض
وباتمنى
جميلة عيونها م الجنة
ياريت لو مرة يوم تفهم
وتعرف عشقى وتسلم
ما انا مش ممكن اتكلم
عشان خاطرك
انا اقدر اخبى العشق جوَّايا
لكن ماقدر يغيب عن دنيتى قمرك
ف لو مرة لمحت الحب
من كلمة تقوليها
أضم الكون ف تفاصيلى
وحضنى راح يكون قصرِك
ده لو عمرى ف عنيكى غالى
حقيقى الغالى يرخص لِك
هى..
بجد الغالى يرخص لَك
لأنك أغلى م الغالى
ياأهلى وعزوتى أنت
ياحبى وكل راس مالى
معاك العمر يحلالى
كأنه ربيع
ألاقى الشوق ينادينى
وقلبى يطيع
وانا طول عمرى مغرورة
وبارفض مبدأ التطبيع
ده أمرى مُريع وانا خايفة
أكون الجانى والحايفة
على قلبك
ده قلبك ليا ضحكاية
فى وقت الحزن
ياأجمل حضن
انا عشته فى أحلامى
يادوايا
ياقصة عايشه جوَّايا
ومالكانى وأسرانى
وواخدانى لدنيا الآه
وحدفانى مع المجاريح
نسيت أسمى وعنوانى
نسيت جبروتى وكيانى
سرسبت الشوق لوجدانى
ف وش الريح
وباكتب لك
حروف الشعر م الننَّى
ماهو اكمنى قاتلنى الشوق
ونفسى أدوق رحيق عشقى
وأحلى الشهد من حبى
أيا ربى
ده مكتوبلى أحبك آه
وأعيش فى عذابه أنا لوحدى
✍🏻يامنه اليمنى
من ديوان/ مشاعر عشق موصولة(هو..و..هى)
موقع ومضات …
عن الكاتب
