هاجر وساب لك ظرف
بقلم عبير الصلاحى
ولما قالوا لي ده هاجر
وساب لك ظرف ..فيه كام حرف
.قريتهم والدموع جارية تغض الطرف
وبترج الحنين جااامد
وبعد ما شقلبت حالي حروفك اللي سايبه لى وجع في الروح وبيناهد
لقتني فجأة باكتب لك و…
بارد عليك في جواباتي
يسلم كل خطوة ليك
من الحاسد ومالحاقد وماللي شاف سمار لونك فعتتني
لان ابوك غرس فاسه في قلب سمارك النيلي وكان قاصد..
وباكتبلك عن الحلم اللي باحلم بيه ليلاتي معاك
تكون فارس على حصانك وانا سحباه لميت مشوار
في سكتنا الخضار طارح لمدد الشوف
وفوق مدنه الحياة حلمه صليبه هلال يكون ساجد
وبابعت لك كمان تصاوير عن اللمة اللي نفسي في يوم تجمعنا مع الاحباب
.ولاد.. احفاد ..ابوك وامك واخواتك ولاد عمك ..بنات خالك وجارك عم عبدالحق صديق عمك ميلاد عابد.
وجوه الصورة فرع زتون من الثجرة اللي فاسك قبل ما تسافر غرس جدرها في الحلم فجدر جوه قلب الليل
واستنى الامل ينزل عالارض اللي شايلة الحلم في جوفها وحالفة تطرحه لما يادن ليها رب الكون
بانه يكون كما البدر
عمار وخضار ودقة زار تلم الكل حوالينا وفي الزفة الجميع ماشي لحد بداية السكة
وعالصورة الاله شاهد
وهابعت لك تلت سلامات ..
سلام كافي يطمن قلبك الطاهر بانه العتمة مهما تطول مسير البدر هينور طريق بكرة وافرح باللقا يا حبيب واقابلك والحنين زايد
وتاني سلام ما فيهش كلام .بان الرحمة موجودة وان الخير في اولادي واولادك قدر ونصيب
وان الحظ لو غتت علينا يوم مسيرها تروق وتحلى لنا .
دوام الحال محال ده اكيد. وبكرة هترسى مركبنا على البر اللي نفسك فيه وتنزل عالتراب ساجد
ولما كانت التالتة اكيد تابتة.
فكان فيها السلام عالكيف.
يحلى مر ايامك ويسقى الصبر لشراقي السنين جواك
..تعيش ميسور .تموت مستور
وتلقاني في يوم الدين عروسة حلمك الاخضر
يا كل راس مال السنين دي وترضية .ونعمة ربنا الواحد
عبير الصلاحي.
عن الكاتب
