![](https://wamadaat.com/wp-content/uploads/2022/12/FB_IMG_1671385144172.jpg?v=1671385494)
![](https://wamadaat.com/wp-content/uploads/2023/01/FB_IMG_1673788114606-1.jpg)
فــــلّاح
بقلم الشاعرة اللبنانية
منى رفيق بولس
غادي مع خيوط الفجر بكّير
هيكي نحت بالدّرب دعساتو
معبّى طريقو بزوغة التّفكير
وزارع بكلّ الأرض آهاتو
بصوتو حلاوة لحن العصافير
والقلب راكض عا تراباتو
كتافو بحمل النّير محنيّين
والفكر حامل همّ صرلو سنين
وعيون تمشي عالحفافي الغافيين
تخمين شطّ رموشها تخمين
ختير عا كِتر الرّكض يوميّه
بسهول عتم اللّيل غدويّه
ونام التّعب بأرضها شويّه
وعاد ورسم عا حدودها ذاتو
شو تلّم التّاريخ بِوِجّو
تلام زرعتها الشّمس أحلام
غادي يا غدوة عمر ما بينام
يكتب عا وج الأرض
كلمات بتخصّو
حتّى انحصد نِصّو
والنِّصّ باقي نسوة الإيّام
الإيدين سهلة قمح موّجتها الرّيح
بقصدا تضمّ غمار فوق غمار
رقيقة .. بترقص عا نغمها مليح
ما عاد تحلم بالعمر مشوار
قرّبت بالخيط عالمهوار
وطيّرت عمرا بليلة عيد
أفكار مشغولة ليوم جديد
*****
بقلم الشاعرة
منى رفيق بولس
لبنان