بنوتة ملامحها هادية كانت صافية و بريئة
جميلة روحها حلوة متقولش غير الحقيقة
من صغرها اتعلمت متضيعش ولا دقيقة
من عمرها ولا حتى ثانية فى حاجة مش مفيدة
اتعلمت العبادة صلاة و صوم و شهادة
زكاة و صدقات و حجاب زادوا حياتها سعادة
شاطرة اوي فى المدرسة الأولى فى الشهادة
ابتدائي إعدادي ثانوي جامعة بقت حلوة بزيادة
طوابير من العرسان بتروحلها كل يوم
خطاب كتير بيجولها من بدري لآخر اليوم
ولا قبلت حد فيهم لأجل اللي عليه العين
ما يجي فى يوم يتقدم لها النصيب المقسوم
فارس أحلامها اللي دايما تتمناه
الراجل الحنين اللي كانت مستنياه
راجل بحق و محترم و يتقى فيها الله
علم و اخلاق و دين يبقا شريكها فى الحياة
يبقا سندها و ضهرها زوجها اخوها و ابوها
عايزاه رومانسي يقولها احلى كلام فى الحياة
كانت صبورة بطبعها و أبدا ما استعجلت
ولا فتحت قلبها لأي واحد وصبرت و استحملت
صانت نفسها و قلبها و حبها كده اتعلمت
من صغرها متميلش مع الهوى ولا يوم له سلمت
خلصت جامعتها الأولى زي عادتها و معيدة اتعينت
فى يوم من الأيام راحت الدكتورة شغلها
مش زي كل يوم النهاردة دق قلبها
الفرحة مش سيعاها ماشية تحمد ربها
اصل امبارح جالها اللي خطف قلبها
اللي عليه العين اللي هيبقا جمبها
راح اتقدم لباباها قالت هي هستخير
راحت اتوضت و صلت الاستخارة و فرضها
وصلت لها البشارة لما شافت فى المنام
عريسها جاي يقابلها و شايل فى ايديه حمام
ابيض جميل و كان له ريش طويل ولا النعام
قالها عايزك زوجتي و حلالي و نروح يلا على المقام
مقام سيدنا النبي محمد عليه افضل الصلوات و السلام
فرحت و خدها من ايديها و فى أمان راحت معاه وراحت زارت المقام
قامت البنت طايرة من الفرح و بلغت ابوها بالمنام
زغاريد كتير اشتغلت و المباركات و السلام
راحت هي لشغلها و عرفت خلاص تمام
ان هو ده المراد حس قلبها بالحنان
شبكة و زغاريد و لمة و هيصة عندهم
حددوا خلاص كتب الكتاب و فرح بنتهم
كانت أحلى ليلة بجد فى عمرهم
لما كانت مفاجأة و خدها و راحوا يعملوا عمرة
كانت بتعيط و سعيدة و من الفرحة كانت طايرة
كل الناس و الحبايب راحت عشان تباركلهم
كل الناس بيحبوها و اتمنوا لهم من قلبهم
انهم يتهنوا و يعيشوا فى سعادة طول عمرهم
و دي كانت بداية الفرحة لقلبها
لما و هي صغيرة صانت نفسها
اتعلموا يا بنات و خليكوا كلكو زيها
حافظوا على نفسكم و قلوبكم من الهوى
مش اي جاحد خدعكوا بالكلام الحلو له تسلموا
و متميلوش مع الهوى و له تستسلموا
اصبروا و صونوا قلبكم لحبكم الحلال
و بلاش تستعجلوا احبابكم
- و الله هيجوا فى وقتهم و هتعيشوا الحب من اوله
نصيحة يا بنات بلاش تستعجلوا
عن الكاتب
